Darjeeling buainain Sikkim a nghawng
West Bengal state aṭanga Gorkhaland pek ngiata Gorkha Janmukti Morcha (GJM)-te'n lungawi lohna an lantir chuan Sikkim a nghawng nasa hle tih tarlan a ni.
Sikkim leh Darjeeling hi inhnai tea awm an ni a, GJM-te hmalakna hian Sikkim state tan pawh harsatna tam tak a thlen phah a ni. Sikkim leh Darjeeling pan tur hian Siliguri paltlang a ngai a, hetih lai hian Siliguri-ah hian Gorkhaland phuta nawrh huaihawtte chetdan duh loa lungawi lohna lantir an awm avangin Sikkim hian harsatna hi an tawh phah a ni. Sikkim sorkar chuan GJM-te hmalakna hi a thlawp thu a lo puang tawh a, hei vang hian West Bengal-a Siliguri-ah hian Sikkim pana tlan lirthei eng emaw zat chu suasam an lo ni tawh a, lirthei chevel a mumal loh avang hian khualzin eng emaw zat pawh an tangkhang a ni.
Sikkim-ah hian mi nuai 10 vel chu tourism leh a kaihhnawiha ei zawng an awm a, heng mite eizawnna hi tunhnaia buaina chhuak hian a ngawng nasa hle a ni. GJM-te'n kawng hrang hranga lungawi lohna an lantir avanga Sikkim-in a tawrhna hi a namai lo hle a, tourism lama an hloh hi cheng vaibelchhe 600 vel zet a tling tawh nia tarlan a ni. Chief Minister Pawan Chamling chuan kumin bikah June thla thleng khan an state tlawhtu khualzin mi nuai 12 vel an awm tih sawiin, mahse GJM-te'n inlakhran phuta nawrh an huaihawt aṭangin tlawhtu an nei tlem sawt hle tih a sawi. State chhunga hostel leh resort 3,000 velten booking awmsa an cancel leh chu thla hnih chhungin nuai khat a chuang tawh a ni. Hemi vanga sum hloh hi cheng veibelchhe 600 a tling tawh a ni, a ti.
Heng bakah hian Siliguri-a lirthei suasam leh tikhawtlai avanga sum luang ral chu cheng vaibelchhe 100 vel a tling tawh nia tarlan a ni bawk. Bungraw ṭawih mai thei te chu kawng lakah hian a chhiat hman ṭhin avangin sum luang ral hi a tam hle a, hei bakah hian nitin mamawh lakkhawm kawngah pawh harsatna a thleng nasa hle. Chief Minister Pawan Chamling chuan kum 1985 khan Darjeeling-ah buaina nasa tak a lo chhuak tawh tih sawiin, hemi ṭum pawh hian harsatna namen lo an tawk tih sawiin, tuna an harsatna tawh nen chuan an sum hloh zat hi cheng vaibelchhe 60,000 vel a nih tawh thu a sawi. National Highway 10 (NH -10) chu an chakkhai lama kawngpui awmchhun a nih avangin, dan a nih lohna tur leh lirthei tlante an him zawkna turin hma lak a ngai tih a sawi a, nakin zelah pawh harsatna an tawh zel loh nan kawng dap a ṭul thu a sawi bawk.