Tuilian avangin ni 10 chuang rel service titawp tawh

Hmarchhak hmun hrang hrangah tuilian avangin rel service tihtawp a ni a, hmarchhak aṭanga West Bengal, Bihar leh state dang pana tlan rel service-te chu ni 10 chuang din tir an ni tawh.

Northeast Frontier Railway (NFR) chuan Thawhlehni thleng khan rel service hi tihtawp a la nih thu sawiin, ni 11 chhung zet rel tlan tihtawp a nih avang hian nitin mamawh bungraw ṭhenkhat chu a vang ṭan tih an sawi. NFR Chief Public Relations Officer Pranav Jyoti Sharma chuan, "Assam, North Bengal leh North Bihar-ahte tuilian avangin rel service tihtawp lailawk a ni a, hei hian eng chen nge a awh dawn hriat a ni lo. August 12 aṭang khan rel tlan hi tihtawp a ni a, hei hian hmun tam takah harsatna a thlen mek a ni" a ti. Inkalpawhna a buai bakah hian nitin mamawh chawkluh leh thawnchhuah kawngah pawh harsatna a thleng mek tih sawiin, mipuite harsatna sukiang tur hian theihtawp chhuaha hma an lak thu a sawi.

NFR-in a tarlan dan chuan hmarchhak state pasarih bakah West Bengal-a district pasarih leh North Bihar-a district panga-te chuan te chuan tuilian hi an tuar nasa zual a, hei vang hian heng state-ahte hian mipuiten harsatna an tawk a ni. Hmarchhak aṭanga New Jalpaiguri station paltlanga rel tlan te chu tihtawp lailawk vek an ni a, hei hian eng chen nge a awh dawn hriat a ni lo. NFR official chuan rel ticket lo hralh chhuah tawh te chu cancel leh vek a nih thu sawiin, hemi vanga sum hloh hi cheng vaibelchhe 550 a tling niin a sawi.

Tun hnai khan Assam Food and Civil Supplies official-te leh NFR official-te chuan bungraw chawkluh dan ngaihtuahin meeting an nei. Meeting-ah hian rel service tihtawp lailawk a nih avanga nitin mamawh harsa chho zel sutkian dan tur an ngaihtuah a ni. Tripura Food, Civil supplies and Consumer Affairs Minister Bhanulal Saha pawhin ei leh bara harsatna an tawh chhoh mek chungchangah NFR official-te chu hma lak pui tuin a ngen a, state dang aṭanga eitur leh nitin mamawh chawkluh a nih theih nana hma lak pui turin a ngen a ni.

Assam Chief Minister Sarbananda Sonowal pawhin Thawhlehni khan Union Railway minister Suresh Prabhu chu phone-a biain inkalpawhnaa an harsatna tawh mekte a hrilh a, ei leh barah harsatna nasa zawk an tawh lohna tura hma lak pui turin a ngen. Sonowal chuan tuilianin hmun tam takah kawngpui a tichhia tih sawiin, hengte hi siamṭhat thuai a nih loh chuan harsatna nasa zawk an tawh theih thu Union Railway Minister hi a hrilh a ni. Tuilenna hmuna mi tam tak chuan ei leh barah harsatna an tawk chho mek tih a sawi. Minsiter Prabhu chuan Assam CM ngenna hi tihhlawhtlin a tiam a, railway offcial-te chuan dan pangngaia a service leh thuai theih nan kawngpui che lai siam ṭhat hna chu chhun zan zawma an thawh thu a sawi. Assam CM hian Union Road Transport and Highways Minister Nitin Gadkari leh Union Minister of State for Civil Aviation Jayant Sinha-te pawh hma lak pui turin a ngen a ni.

NFR Chief Public Relations Officer Pranav Jyoti Sharma chuan tuilianin ziaawm lam a panchhoh zel chuan, hmarchhak aṭanga ram chhung hmun dang panna rel kawngte hi September thla tir lamah chuan dan pangngaia hawn leh hman beisei a nih thu a sawi. Hetih rual hian tuilianin rel kawng eng emaw zat a tihchhiat avangin hun eng emaw chen chu kawngpui siamṭhat nan hun an la mamawh dawn tih a sawi.