Assam tuilianin ziaawm lam a pan

Assam ah ruah tui tla a tlem chhoh deuh avangin tuilian pawh hian ziaawm lam a pan chho mek nia tarlan a ni.

Assam-ah hian ruah­sur nasa avangin kumin June thla tir aṭang khan hmun hrang hrangah tui a lian a, district zawng zawng deuh thawin harsatna hi an tawk a ni. Tuilianin chhiatna hrang hrang a thlenah mi 150 vel an thi tawh a, hliam tuar eng emaw zat an awm bawk. A tam zawk hi tuia tlahlum an ni a, chin hriat loha bo leh current-in a man hlum eng emaw zat an awm a ni. Thi zingah hian hmeichhia leh zirlai eng emaw zat an tel bawk. July thla tawp lam khan tuilian hian ziaawm lam a pan a, tun thla tir lam khan ruah nasa taka a sur avangin tuilian hian zual lam a pan leh a, nunna chan pawh mi 70 an awm belh a ni. Mahse tunah chuan tuilian hian ziaawm lam a pan chho leh mek tawh a ni.

Assam State Disaster Management Authority (ASDMA)-in an tarlan dan chuan district 33 zinga 12-te chuan tuilian hi an la tuar a, nunna chan pawh an awm belh tawh rih lo. Dhemaji, Lakhimpur, Barpeta, Chirang, Kokrajhar, Dhubri, South Salmara, Goalpara, Morigaon, Nagaon, Golaghat leh Majuli-te chu tuilian tuar ingah hian an la tel a ni. Nilaini thleng khan mi nuai 11.02 chuangin harsatna hi an la tawk a, thlai chinna hmun ram hectare 9,000 vel a la chim bawk. Hetih rual hian hmun tam takah Brahmaputra lui chuan hlauhawm chhinchhiahna a la pel a, a bul hnaia chengte chu fimkhur tura hriattir an ni.

ASDMA chuan chhungkaw tam tak chu an in leh lo lamah an kir leh tawh tih sawiin, relief camp ṭhenkhat pawh khar a nih tawh thu an sawi. Hetih lai hian mi 31,519 vel zet chu relief camp-ah an la khawsa a ni. Kuminah hian tuilian hian thlai chinna hmun ram hectare nuai 2.83 vel a chim a, ranvulhna hmun ram bigha nuai 1.71 leh ar vulhna hmun zau tak chu tui hian a chim a ni. Cheng vaibelchhe tam tak man hu infrastructure a chhia a, heng zingah hian kawngpui, lei leh building te a tel a ni. Barpeta, Kokrajhar, Dhemaji, Dhhubri, Nagaon leh Dibrugarh district-ahte infrustructure chhia hi a tam zual nia tarlan a ni.

Tuilian hi a nasat lai berin district 33 zinga 28-a cheng mi nuai 25 velin harsatna an tawk a, Kaziranga National Park ram 85% vel zet a chim bawk. sorkar laipui chuan Assam-a tuilian tuarte ṭanpui nan hian cheng vaibelchhe 1,500 vel a ruahman sak a, Prime Minister Naredra Modi chuan tuilian tuarte a tlawh ṭumin chhawmdawlna atan cheng vaibelchhe 15 vel a pe bawk. Kumina tuilian hi Assam-in tuilian a tawrh tawha la nasa ber pawl a nih thu tarlan a ni bawk.