Arunachal Pradesh : Forest clearance la awm loh vangin oil exploration project thawk thei lo

Arunachal Pradesh-a Tirap district-a oil exploration project thawh tur chu state forest deparment leh union environment ministry aṭangin clearance tihfel a la nih loh avangin kalpui theih a la ni lo tih a sawi.

State assembly session neih mekah, geology and mining minister Kamlung Mossang chuan Congress MLA Wangling Lowangdong zawhna chhangin, forest clearance an la hmuh theih loh thu leh, National Board of Wildlife (NBWL) lam pawhin project thawh phalna hi an la pe lo tih a sawi bawk.

Minister Mossang chuan Oil India Limited (OIL) chuan kum 2016 leh 2017 khan state forest department leh union environment ministry hnenah clearance proposal hi an thehluh tawh thu a sawi. Kum 2020 August thla khan state-1 clearance chu sorkar laipui hian pe mah se, stage-2 pek a la ni lo, a ti.

Oil exploration project thawhna tur, Tirap district-a Deomali aṭanga km 10-ah Dihing-Pataki wildlife sanctuary a awm a, hei hi nikum June thla khan Assam sorkar chuan national park-ah a puang. Hei vang hian NBWL aṭang pawhin clearance an neih tel a ngai a, mahse Assam sorkar chuan dilna hi ala tikhawtlai bawk niin Minister chuan a sawi.

Ministry of Petroleum and Natural Gas chuan kum 1998 khan Deomali-a ram sq km 356.16-a zauah project kalpui turin OIL hnenah Petroleum Exploration License (PEL) a lo pe tawh a ni.