Assam-in State Research Foundation din dawn

Assam chief minister Himanta Biswa Sarma chuan National Research Foundation zulzuiin, state sorkar chuan State Research Foundation a din dawn tih Ningani khan a sawi.

Conference on implemenation of National Education Policy 2020 a hmanpuinaah thu sawiin, Chief Minister chuan Research Foundation hian innovative research lamah hmasawnna thlenin, hei hian education sector lamah nghawng ṭha tak a nei dawn a ni, a ti.

Conference hi Governor Secretariat leh state sorkar hnuaia Higher Education Department-ten an buatsaih a ni.

CM Sarma chuan, "Zirna changtlung leh ṭha zawk a awmna turin NEP 2020 hi kan hmang dawn a ni. State GDP-a 6% education tana kan dah hian, human resource lam tihhmasawn kan tumzia pawh a tilang a ni," a ti.

Department of higher education chuan department dangte thawhpuiin, start-up ecosystem leh entrepreneurship lama zirlaite puihna turin skill and training module an kalpui dawn bawk a ni. Sarma chuan entrepreneurship lam chawilarna turin a kaihhruai sorkar chuan Bongaigaon, Silchar, Dibrugarh leh Tezpur-ah nano-incubation centre pali din a nih tur thu a sawi bawk. Heng hmuna faculty member-te hian zirtirtu ang ringawt ni loin, mentor leh guide angin zirlaite an pui dawn tih a sawi.