Tripura-ah BJP leh CPI(M) worker-te intibuai leh

Tripura-ah political party worker-te zingah intihbuaina a thleng fo a, Ningani khan Sepahijala district-ah Bishalgarh area-ah rorellai, BJP leh eptu, CPI(M) worker-te intibuai lehin, mi eng emaw zatin hliam an tuar.

Party pahnih worker-te hian vantlang thilte pawh an tichhe nual a, Bishalgarh hospital area-a motor dingte pawh an vawchhe bawk. Buaina chhuak vang hian Tripura State Rifle sipaite chu tirh nghal niin, security pawh tihkhauh nghal a ni.

CPI-M chuan party event an nei zo an haw lam chu BJP worker-te hian an lo bei hmasa niin an sawi a, BJP erawh chuan CPI-M chu pawisawilote beiah an puh ve thung.

CPI-M state secretary Jitendra Chowdhury chuan, "BJP chuan democracy zahna an neih loh zia an tilang leh a ni. Bishalgarh-ah rally kan nei a, hei hi a hma daih aṭanga ruahman tawh a ni. Police-te pawhin phalna min pe vek tawh bawk. Mahse rally kan neih laiin police-te hian min rawn dang leh a, kan programme pawh titawp turin min rawn ti a ni," a ti. An programme an tihtawp hnua party worker-te haw tur chu BJP leh an thurualpui misual rualte chuan an rawn bei ta mai niin a sawi.

Chowdhury chuan, "Kan party worker-te awmze nei loa beih an nih fo leh, police-ten ruling party lam an ṭan zel a nih chuan, kan party worker tan chuan an inluling lutuk tur lo dodal hi a ngai a ni. Ruling party chuan an inlulinna hmun atan Tripura hi an thlang a ni," a ti.