Assam sorkarin China hydrological data tarlang turin phut

Assam sorkar chuan India leh China-te'n Brahmaputra lui an insem chungchanga hydrological data tarlang turin sorkar laipui a phut.

Assam sorkar thupuangtu Himanta Biswa Sarma chuan May 15 aṭang khan China sorkar chuan hydrological data hi India a hriattir tawh lo nia sawiin, Ministry of External Affairs (MEA) chu hemi chungchang sawifiah tur leh hma la tura a phut thu a sawi. Sarma chuan August 8 aṭanga tuilian an tawrh leh chu ruahtui tlak tam vang a ni lo tih sawiin, harsatna an tawh chhanah hian China sorkar a inrawlh em tih finfiah turin sorkar laipui chu an ngen tih a sawi. Hetih rual hian hmarchhaka tuilian chu ruahsur nasa vang tih an pawm tih sawiin, Assam-a tuilian erawh Brahmaputra lui len vang a ni a, chuvangin India-China hydrological data hi finfiah a ngai a ni,a ti.

Hemi chungchangah hian sorkar laipui chu a rang lama hma la tura an phut thu sawiin, Brahmaputra lui hnar lama China tuikhuah aṭanga tui chhuak zat chu finfiah a ngaih thu a sawi. Kum 2006 khan India-China Expert-Level Mechanism-ah China chuan tuikhuah aṭanga tui luang chhuak zat hi India hriattir turin remna siam a lo ni tawh a ni. Inremna ang chuan China chuan Brahmaputra leh Satluj lui hnar lama tuikhuah a siam aṭanga tui luang chhuak zat hydrological data, May 15-October 15 chhung chu India a hriattir tur a ni a, mahse kuminah hydrological data hi tarlan a ni lo, a ti. Kum 2013 khan hemi chungchangah hian ram pahnihte chuan Memorandum of Understanding (MoU) an lo ziak tawh bawk.

Hetih lai hian China sorkar chuan kumin May 15 hnu lamah hydrological data hi a tarlang tawh lo a, hei hi inremna bawhchhiatna a nih thu Assam sorkar chuan a tarlang. August thla tir lam aṭanga tuilian leh hian Assam sorkar ngaih a tiṭha lo hle a ni.

Finance, Education and Health Minister ni bawk Sarma chuan, "Brahmaputra lui hnar lamah ruah a sur nasat hian ni hnih thum bak tui a lian ngai lo, Assam leh Arunachal Pradesh-a tuilian hi khawi aṭanga lo kal zozai nge hriat a ni lo" tiin, tuilian avanga harsatna nasa tak thleng chu hriatthiam harsa a tih thu a sawi. Hei bakah hian Brahmaputra lui hnar lamah ruah a sur nasat chuan lui kama awmte chu tuilian laka inveng turin hriattirna an pek hman ṭhin thu a sawi bawk. Chuvangin China hian Assam mipuite harsatna a thlen hreh lo ang tih a rin theih a, ngawihbo pui mai chi a ni lo, a ti.

Tun thla tir lam aṭanga Assam-a tuilian hian district 33 zinga 24-a cheng mi nuai 3.2 vel tan harsatna a thlen leh a ni. Nunna chan 70 chuang an awm bakah, mi tam takin an in leh lo an chan bawk.