NPF leh BJP chhunfin tumna a awm lo : Zeliang

Nagaland Chief Minister TR Zeliang chuan Naga People's Front (NPF) leh Bharatiya Janata Party (BJP)-te an thawkho dawn nia tarlan chu thu belhchian dawl lo a nih thu sawiin, inchhunfin tumna a awm lo, a ti.

Nagaland-a rorel lai NPF chuan BJP thawhpui a tum nia tarlan a ni a, mahse hei hi thu belhchian dawl lo a nih thu TR Zeliang chuan a sawi a ni. Zeliang chuan, BJP nena thawkho turin hmalakna engmawh a awm lo, thu thang hi khawi aṭanga rawn chhuak nge hriat a ni lo, a ti. Chief Minister hlui Neiphiu Rio pawhin BJP thawhpui tur hian hma a la lo tih sawiin, inchhunfin tumna a awm tih chiang takin a sawi. Mipuite rilru lakpen tumna mai a nih thu sawiin, NPF chuan assembly election a hmachhawn leh turah pawh party dang a thawhpui dawn lo, a ti.

TR Zeliang chuan chief minis­ter paihthlak tak Dr. Shurhozielie chungchang sawiin, NPF party chhunga buaina awm chu amah leh Dr. Shur­hozielie thlawptute inkara khi chat awm vang a nih thu sawiin, party symbol hman chungchang pawh Election Commission of India (ECI)-ah thlen a ni tawh a, chinfelin a awm thuai dawn a ni, a ti. Hetih rual hian Dr. Shurhozielie chetdan chu a dem thu sawiin, party kalphung kalha a chet avangin NPF party president a nihna aṭanga bang tura a duh thu a sawi. Party aṭanga mi eng emaw zat suspend an nih chhanah mawhphurtu ber a nih thu sawiin, a khawsak dan chu pawmzam mai theih a nih loh thu a sawi.

Chief minister chuan NPF party president Dr. Shurhozielie chu amah thuneihna hmanga party kaihruaiah puhin, MLA leh member dang eng emaw zat suspend an nih laia party hruaitu turte ama thuneihna hmanga ruatah a puh bawk.

Nagaland-ah hian rorel lai NFP party chhungah buaina a awm avangin party president chu chief minister a nihna aṭangin paihthlak a ni a, TR Zeliang-a chu a aiawh tura lakluh nghal a ni. TR Zeliang-a leh Dr. Shurhozielie-te hian a hranin lamṭang an nei ve ve a, an inkar boruak pawh a ṭha lo hle. NPF MLA tam zawk chu Dr. Shurhozielie-a lakah an hel a, chief minister a nihna aṭanga paihthlak tumin hma an la zui nghal. Hetih rual hian chief minister aṭanga bang TR Zeliang-a chu a rawn lang nghal a, NPF MLA-te nen hian sorkar thar din turin hma an la zui a ni. MLA-te hi Assam-a Kairanga National PArk (KNP)-ah hun eng emaw ti chhung an inkulh a, Nagaland-a an let leh hnuah Governor pawmpuinain sorkar thar an din zui ta ni. Mahse NPF party chuan heng MLA hel te hi a suspend zui a, chief minister TR Zeliang-a chu party thilah kum ruk chhung inhnamhnawih lo turin a hrem zui bawk.

NFP party chhunga buaina awm mek lai hian tun hnai khan BJP nen thawkho tur anga sawi a awm a, hei pawh hian sawi zui a hlawh nghal hle. Mahse chief minister TR Zelaing chu a ṭawngchhuak thuai a, thawhho an tum loh thu leh inchhunfin tumna pawh a awm loh thu a sawi ta a ni.