Assam CM-in hmarchhakah presidential retreat din turin ngen

Assam Chief Minister Sarbananda Sonowal chuan Prime Minister Office (PMO) chu hmarchhakah presi­dential retreat din a nih theih nana hma la turin a ngen.

Assam Chief Minister chuan hmarchhaka presi­dential retreat sak chu thil pawimawh tak a nih thu sawiin, ram inpumkhatna tilangtu tur a ni, a ti. Hemi chungchangah hian Ningani khan Prime Minsiter Office-ah ngenna a thlen a, hma lakpui turin a ngen. Sonowal hian hemi chungchang hi principal secretary to the Prime Minister, Nripendra Mishra pawh a lo sawipui tawh a ni. Hemi chungchang hi Assam chief minister hian President Ram Nath Kovind pawh a lo sawipui tawh bawk a, hmarchhaka presidential retreat din chu ram inpumkhatna atana thil pawimawh tak a nih thu a hrilh a ni. Hmarchhakin enhran a lo tawh ṭhinna thaibo tur te, sorkar laipuiin hmarchhak a ngaihpawimawh zia pho­lanna tur leh ram inpumkhat zia tarlanna tur ṭha tak niin a sawi bawk.

Presidential retreat hi Shimla leh Hyderabad-ahte a awm mek a, hmarchhak huamchhungah din ve tura ngenna a awm ta a ni. Shimla-a presidential retreat building hi British hun lai, kum 1895-a sak a ni. Mashobra-ah sak niin a awmna hi a sang hle a, uluk taka design niin, khaw hawi velna hmun remchang tak leh khualzinte hiptu ber pakhat a ni.

Hyderabad-a mi hi Rashtrapati Nilayam building tia sawi a ni a, thing hmang veka sak a ni. Kum 1860 khan sak a ni a, a ram zau zawng hi acre 90 niin, room 11 a awm a, dining hall, cinema hall, Darbar hall leh morning room ṭha tak a awm.