Meghalaya Assembly sak meka dome chimna chhan sawifiah

Meghalaya Assembly building thar, Mawdiangdiang-a sak meka a chung mum, dome chim chungchang chhuitu, IIT Guwahati chuan a rih lutuk vang leh, hnathawktu agency-te thawhhona ṭhat tawk loh vanga chim niin a sawi.

IIT Guwahati hian an thil chhui report hi thehlut tawhin, dome chim chhan hi a rih lutuk vang tiin, designer leh contractor-te thawhhona a ṭhat tawk loh vang a ni tel bawk a ni, a ti.

Meghalaya chief minister Conrad K Sangma chuan IIT Guwahati report hi a sawi lang a, agency-te chu thawk ho ṭha se chhiatna hi a thleng lo ang, a ti.

An chhui hna an zawh hnuah IIT-Guwahati hian Meghalaya Legislative Committee-a High-Powered Commtitee (HPC) hnenah kar liamta Zirtawpni khan report hi an thehlut tawh a ni. Report an dawn hnuah, HPC hian project designer leh contractor-te insawifiah tura ko turin state sorkar a hriattir nghal a, an insawifiah dan azirin an chunga action lak dan tur chu Committee hian a la ngaihtuah ang.

Chief Minister chuan report-ah hian building hmun dangte chu a him tawk tih tarlan a nih thu leh, structure leh foundation-te pawh a ṭha tawk a ni, a ti. Dome structure-ah hian zangkhai zawk, steel tubular struss structure, CGI sheet-a khuh chu hmang turin report siamtute hian rawtna an siam nghal bawk.