Tripura : Oct 31 aṭangin Film institute hawng dawn

Tripura information and cultural affairs minister Sushanta Chowdhury chuan Tripura-a Satyajit Ray Film and Television Institute (SRFTI) chu October 31 aṭangin hawn a ni tawh dawn tih a sawi.

Tripura campus-ah hian a thawh khatnaah short-term course pali kalpui phawt a ni dawn a, campus awmna hmun atan hian Nazrul Kalakshetra chu thlan fel a nih thu a sawi bawk.

September 5 khan Minister leh department secretary Pradip Kumar Chakraborty-te chuan SRFTI main campus an tlawh a, Director leh Registrar te an hmu a ni.

Minister chuan, " SRFTI Tripura campus chungchanga thil pawimawhte kan sawiho a ni. State sorkar chuan film institute atan hian state budget aṭangin Rs vbc 5.75 a sanction a, hemi aṭanga Rs vbc 1.10 chu pekchhuah tawh niin, PWD hnuaiah work order pawh tihchhuah a ni tawh bawk. Agaratala Municipal Corporation chu building tifai tur hian ngen an ni. SRFTI official-te thurawn angin, sound management, lighting leh gadget pawimawh dangte pawh dah vek a ni ang," a ti.

Short term course pali kalpui turte hi - Film Appreciation course, Screen acting court, Production Management leh Achoring or News Reading course-te a ni.

September 20-ah admission notification tihchhuah a ni dawn a, October 20 thleng dil theih a ni ang. Candidate thlante hian registration fee bak fee dang an pek a ngai dawn lo a ni.