Assam-ah Rs vbc 7 hu ruihhlo man a ni

Assam-a Karbi Anglong leh Karimganj district-ah Inrinni liam ta khan Assam police leh CRPF joint team chuan cheng vaibelchhe 7 man hu ruihhlo an man a, mi panga an man tel bawk.

Thu an dawn bawhzuiin, police leh CRPF joint team hian Karbi Anglong district-a Lahorijan area an dap a, Manipur aṭanga rawn kal motor pakhat aṭangin ganja kg 800 leh heroin gram 40.07 an man a ni. Motor-a chuang mi pathum an man bawk a, an ruihhlo man hi international market-ah Rs vbc 3 chuang hu nia chhut a ni.

Inrinni vekah khan Karimganj district-a Churaibari outpost-ah Tripura aṭanga lut, truck pakhat aṭangin ganja kg 1,108 man a ni bawk a, Rs vbc 3.85 man hu a tling. Ganja neitu mi pahnih an man tel tih police-te chuan an sawi.