Medical Seat : Arunachal seat 4 paih sak Meghalaya seat 26 aṭangin 42-ah tipung

State hrang hrangten central quota-a medical seat an neih zat chu siamrem a ni a, Arunachal Pradesh chu seat 4 paihsak an ni a, hetih lai hian Meghalaya-in seat 26 a neih mek chu seat 42-ah tihpun a ni thung.

Hmarchhak state-te chuan kum kalta khan medical seat hi 28 vel ṭheuh an nei a, North Eastern Council (NEC) sponsor seat thum a awm bawk. Arunachal health services director Dr Moji Jini chuan medical seat tihtlem a nih chungchangah hian Union Health Secretary aṭanga hriatrirna an dawn tawh thu a sawi a, hetih rual hian medical leh dental-ahte seat tam zawk an beisei tih a sawi. Health services Joint Director Dr R Doye chuan seat tihtlem a ni chu pawi a tih thu a sawi a, an seat chan zat tihtlem a nih laia Meghalaya seat chan tihpuna ni chu hriathhiam a har thu a sawi.

Hemi chungchangah hian Arunachal sorkar chuan NEC secretary Ramnganing Muivah chu hma la thuai turin a ngen a, medical seat nga pek belh turin a ti. Chief Minister Pema Khandu pawhin Union Health Minister J P Nadda hnenah ziakin a thlen tawh a, state quota tihhniam sak an ni chu pawi a tih thu sawiin, seat hi pek belh leh turin a ngen a ni.

State BJP president leh central executive member ni bawk Tapir Gao chuan state qouta tihniam sak an ni chu pawi a tih thu sawiin, hemi chung­chang hi Union Health Minister J P Nadda hnenah thlen a nih tur thu a sawi ve bawk. Education Parliamentary Secretary Pani Taram pawhin he thil hi ngawihbopui mai chi a nih loh thu sawiin, a ṭul anga bawhzui a nih tur thu a sawi. Arunachal mi leh sa Union Minister of State for Home Affairs Kiren Rijiju pawhin pawhin state quota tihhniam sak an ni chu pawi a tih thu sawiin, hma lak a tiam.

Bhubaneswar-a awm mek Arunachal MP Ninong Ering chuan seat tihtlem sak an ni chu pawi a tih thu sawiin, hemi chingfel tur leh seat pek belh an nih theih nan New Delhi pan thuai a tum thu a sawi. Ani bakah hian Chief Minister hlui Nabam Tuki pawhin medical seat tihtlem an ni chu hriatthiam har a tih thu sawiin, mihring pun dan ang zela seat chu pung zawk tura a ngaih thu a sawi.

Hetih lai hian Meghalaya-in central-a medical seat a neih zat 26 chu 42-ah tih puan a ni. Meghalaya tan hian North Eastern Indira Gandhi Regional Institute Health and Medical Science chuan MBBS seat pakua a pek belh a, state quota hi a san phah nia tarlan a ni. Chief Minister Dr. Mukul Sangma chuan North Eastern Indira Gandhi Regional Institute of Health and Medical Sciences (NEIGRIHMS) chu MBBS seat awmsa 50 chu 100-ah tipung turin a ngen bawk. Hetih lai hian hmarchhak state dang Mizoram-in medical quota 25-27 a neih chu seat 17-ah tihhniam a nih thu tarlan a ni bawk.

Union Minister of State (Tribal Affairs) Jaswantsinh Bha­bhor chuan July thla khan Lok Sabha-ah tribal area-a Primary Health Centre (PHC) awm zat chu kum 2016 chhung khan tihtlem a nih thu a lo sawi tawh bawk. Tribal tamna hmarchhak state tan chuan hei hi thu lawmawm a ni lo. Tun dinhmunah tribal area-ah hian PHC 1,266 a awm mek a, doctor 645 an awm bawk. Ram pumah PHC hi 4,012 a awm mek a ni. Madhya Pradesh-ah chuan PHC hi 381 a awm a, hetih lai hian hmarchhak state Assam-ah chuan 50 awmin, PHC tamna ber a ni. Meghalaya-ah PHC paruk awmin, state dangte nen a inthlau hle a ni.

Kum 2011 chhiarpuiah khan India ram puma tribal awm zat chu, ram mipui aṭanga 8% a ni.