Assam Paper Mill din thar lehna turin vbch 1,800 dil

Assam Chief Minister Sarbananda Sonowal chuan Assam Paper Mill din thar lehna turin sorkar laipuiah ṭanpuina cheng vaibelchhe 1,800 a dil.

Assam Chief Minister hian Nilaini khan Union Finance Minister Arun Jaitley chu New Delhi-ah hmuin, Paper Mill din thar lehna tura an sum mamawh hi a thlen a ni. Sonowal chuan an state-a paper mill-te din thar leh tur hian theihtawp an chhuah tih sawiin, sum tam tak an mamawh thu a thlen. Hindustan Paper Corporation, Nagaon paper mill leh Cachar paper mill-te chu chei ṭhata hawn leh tura ruahman a ni a, hma pawh chak taka lak a ni. Hemi atan hian cheng vaibelchhe 1,800 vel an mamawh thu sawiin, finance minister chu hma lak pui turin a ngen a ni.

Chief Minister Sonowal hian North East Industrial Invest­ment Promotion Policy (NEIIPP) chu a taka kalpui thuai a nih theih nana hma lak pui turin Arun Jaitley chu a ngen bawk.