Manipur-ah tuilianin fahrah chenna 120 tichhia

Manipur-a Senapati District-ah kar kalta Inrinni khan nasa takin tui a lian a, hei hian fahrah chenna-in 120 a tichhia.

Senapati District-a Kathikho Karong-ah hian Compassionate Children Ministries Caring Home leh Compassionate Residential Academy a awm a, hei hi state chhunga fahrah chenna hmun pui ber a ni. Barak lui lian chuan helai hmun hi a chim a, bungrua cheng nuai 25 man vel hu a la a ni. Bungrua a lak zingah hian utensil, furniture, keyboard, PA system, lehkhabu leh document pawimawh eng emaw zat a tel a, campus chhunga swift car pawh tuilian hian a la a ni. School building pawh a chhe nasa hle a, thuamhnaw leh eitur eng emaw zat a len bo bawk a ni.

Compassionate Children Ministry-a an hotu Robin Raomai Hena chuan, "Zing dar hnih velah ka tho a, room chhung chu tuiin a lo chim vek tawh a, naupangte chu tho tura ka tih hnuah kan inthiarfihlim thei ta a ni" a ti. Minute rei lote hnuah room chhung chu tuilian chuan a chim pil nghal vek a, bungrua engmah chuh hman a ni lo, a ti bawk.

Compassionate Children Mi­nistries Caring Home leh Resi­dential Academy-te hi ministry pakhat hnuaia awm an ni a, fahrah tan bika din niin chenna-in 120 vel a awm a, he lai hmuna hian naupang te chu a thlawna zirna pek an ni. Chhiatna thlenna hmunah hian ei leh in tur bakah, thawmhnaw ṭhahnem tak thawn luh a ni a, ṭanpuina hna hi chak taka thawh a ni.