Assam-ah tuilian tuar district 7 la awm

Assam-a tuilian chuan ziaawm lam a pan zel a, tuilian tuar pawh an tlem tial tial tih tarlan a ni.

Assam State Disaster Manage­ment Authority (ASDMA) report-in a tarlan danin district pasarih-te chuan tuilian hi an la tuar mek a, harsatna tawk hi mi nuai 2,67 vel chauh an awm tawh a ni. Dhemaji, Lakhimpur, Barpeta, Chirang, Morigaon, Nagaon leh Golaghat district-a khaw 472 chuan tuilian hi an tuar a, heng hmunah te hian deluge a leng mek nia tarlan a ni. Lakhimpur, Morigaon, Chirang leh Nagaon district-a tuilian tuar mi 25,253 te chu relief camp 62-ah an khawsa a, hmun tam takah relief camp-a cheng an la awm a ni.

Hetih lai hian Northeast Frontier Railway (NFR) thupuangtu Nripen Bhattacharyya chuan hmun hrang hrangah tuilianin rel kawng a tihchhiat siam zawh loh a la awm avangin September 1 hma chu rel service tihtawp a nih tur thu a puang. Nripen Bhattacharyya chuan, "August thla chhungin rel hi dan pangngaia service tir leh tum a ni a, nimahsela harsatna dang a awm avangin September 1 thleng nghah a ngai dawn a ni", a ti. Hetih rual hian mamawhna a san em avangin vawiin aṭang hian bungraw phur rel te chu tlan tir an ni dawn tih a sawi. Passenger train-te chu September 1 aṭangin tlan tir tum an ni a, special train pawh tlan tir thuai a ni ang, a ti bawk.

Assam-ah hian kumin chhungin tuilian avanga thi mi 156 an awm tawh a, inkalpawhna leh inbiak pawhna thlengin a buai a, infru­structure chhia a tam hle bawk.