Assam CM-in FIFA U-17 World Cup logo tlangzarh

Assam Chief Minister Sarbananda Sonowal chuan kar kalta Inrinni khan FIFA Under-17 World Cup host city logo chu Guwahati khawpuiah a tlangzarh.

Guwahati host city logo tlangzarhna inkhawm hi Indira Gandhi Athletic Stadium-ah neih a ni a, Sonowal chuan India-in football inkhawmpui lian a thleng tur chu hmasawnna ropui tak a ni,a ti. Guwahati-ah match ṭhenkhat khelh a ni dawn a, hei hian infiammite tan chona nasa tak a pek ngei a rinawm a, infiamna lama thil chhinchhiah tlak tak a nih ngei a beisei awm a ni, a ti. Assam CM hian official trophy pawh a tlangzarh a, trophy hi Judges Field-ah dah a ni dawn a, Mission XI Million festival neih chhungin mipui hmuh theiha pho chhuah a ni ang.

Assam khawpui Guwa­hati hian nakkuma India-in FIFA Under-17 World cup a thlen turah match ṭhenkhat chu a thleng ve dawn a, hemi atan hian inbuatsaihna pawh kalpui mek a ni. Under-17 World cup thleng tur hian khawpui paruk thlan chhuah a ni a, Guwahati-ah hian semifinal khelh a ni ang. Tournament director Javier Ceppi chuan Guwa­hati Host City Logo tlangzarh a ni ta chu lawmawm a tih thu sawiin, Assam sorkar nen thawhhona ṭha tak an neih zel a beisei tih a sawi.