Article 371F dodalna lantir vangin Sikkim miten kawng zawh

Sikkim mi eng emaw zat chuan tun hnaia Bihari mi pahnihin Jantar Mantar, New Delhi-a Sikkim special status pekna, Constitution-a Article 371F dodalna an lantir avanga lungawi loin, Pathianni khan Gangtok-ah kawng an zawh.

Kawng zawhnaah hian social activist Passang Sherpa pawh a tel a ni. Sherpa chuan, "Jantar Mantar-a Article 371F dodalna lantirtute chu ram hmangaihlo tu an ni. Article 371F hi tihdanglam a nih chuan, Sikkim chu state puitling ni loin, associate state chauh a ni ang. Heng mi pahnihte hian Sikkim mite rilru an tichiai hle a ni. Hei vang hian sorkar laipui leh state sorkar hnenah, Article 371F tihdanglam tumna a awm anih chaun Sikkim mipuiten eng kawng mahin an enliam dawn lo tih lantirna atana he hun hi kan huaihawt a ni," a ti. Kawngzawh hi political party huaihawt ni loin, Sikkim mipuite huaihawt a nih thu a sawi nghal bawk.

Sherpa chuan, mi pahnihte laka an lungawi lohna lantirna chauh ni loin, Article 371F ngaimawhtu zawng zawngte laka lungawi lohna an lantirna a ni tih a sawi. Article 371F chu inremna hmanga siam thlap a ni, a ti. "Kum 1975, May 16-a India rama Sikkim a tel khan India sorkar leh Sikkim mipuiten he inremna hi an siam a ni. Hei hi Sikkim political, economic leh social rights venhimna tura tih a ni," a ti.

Hetih lai hian Bihari pawl hrang hrang chuan Jantar Mantar-a Bihar mi pahnihte thiltih chu an thlawp loh thu leh an dem thu an sawi.

Sikkim police-ten Jantar Mantar-a Article 371F dodalna lantir chungchangah mipuite hma la zui lo tura an ngenna chu sawichhuakin, Sherpa chuan police-te hi dan leh thupek kengkawhtu tur, mipuite dikna chanvo neiha inrawlh tur an ni lo tih a sawi. "Buaina chawk chhuak zawng ni lo, democracy dan zawm chunga lungawi lohna lantir chu a theih vek a ni. Mipuite chu an tih tur leh tih loh tur an hrilh tur a ni lo," a ti.

Jantar Mantar-a thil thleng chungchanga lungawi lohna hi Bhaichung Bhutia party, Hamro Sikkim Party leh Sikkim Suraksha Samiti chuan lantir an tum tih an sawi bawk.