Assam-Meghalaya : Ramria cheng Gorkha-ten Assam lama beh duh

Assam leh Meghalaya state-ten ramri buaina chinfelna tur inbiak thawh hnihna an neih mek karah, border area-a thingtlang khaw hrang hranga Gorkha hnam 10,000 chuang chuan Assam lamah beh an duh thu an sawi.

State pahnihte hian ramri buaina an neihna hmun 12 zinga hmun parukah inremna an siam tawh a, a bak hmun paruka inremna siam leh turin inbiakna an kalpui leh ṭan tawh a ni.

Assam Gorka Sanmilan (AGS) chuan state pahnihte hmalakna chu lawmawm an tih rualin, Kamrup district-a Lumpi area leh, West Karbi Anglong district-a Umlapher border area-a cheng, Gorkha hnam chuan Assam lamah awm zel an duh tih an sawi a ni. Lumpi hi Assam-a Kamrup leh Meghalaya-a West Khasi hills district inrina niin, West Karbi Anglong district-a Block I leh Block II -te chu Meghalaya-a Ri-Bhoi leh West Jaintia hills district-te nen an inri a ni.

AGS president Krishna Bhujel leh chief general secretary Lakshmi Sedai kaihhruaiin AGS aiawhte hian Assam border affairs minister Atul Bora an hmu a, memorandum an thehlut nghal bawk.

AGS Kamrup district president Arjun Chetry chuan, "India independence aṭangin kan mite hi border village-ah hian an khawsa tawh a ni. Harsatna hrang hrang pawh kan tawk fo a, mahse Assam lamah beh zel kan duh a, Meghalaya state lamah awm kan duh lo a ni," a ti. An ram inches khat pawh Meghalaya tan an pe dawn lo tih a sawi bawk.

Assam sorkar hnenah, Meghalaya sorkar nena inbiakna an neih mekah thutlukna a siam hmain bordre area-te chu enfiah hmasa phawt tura an phut thu an sawi.