Meghalaya tuilianah mi panga thi
Meghalaya-a West Garo Hills district-ah tuilian vangin mi panga an thi tawh a, chief minister Conrad Sangma chuan thi chhungte hnenah zangnadawmna cheng nuai li ṭheuh pek an nih tur thu a sawi. CM Sangma chuan tuilian avanga mi pangain nunna an chan chu pawi a tih thu sawiin, an chhungte zangnadawmna pek an nih tur thu hi a sawi a, state sorkar chuan mipuite himna turin theihtawp a chhuah mek a ni, a ti.
West Garo Hills deputy commissioner Ram Singh chuan tuilian hi thingtlang khaw 181-a mi 1,48,639 ten an tuar tih a sawi. Union home minister Amit Shah pawhin West Garo Hills-a tuilian tuarte a tawrhpui thu sawiin, nunna chan an awm chu pawi a ti hle tih a sawi. CM Sangma pawh biain, sorkar laipui chuan harsatna an tawh mekah a theih anga puih zel a inhuam thu a hrilh.