Assam district hrang hrangah hri kai pun belh zel

Assam-ah hri kai an la pun belh chak hle a, Thawhlehni khan hri kai hmuh chhuah thar mi 1,680 an awm leh. Hri kai hi mi 26,772 an tling tawh a ni. 

Guwahati khawpuiah hri kai an pung zel a, hemi rual hian district dang eng emaw zatah pawh Covid-19 kai hi an pung chho chak hle. State sorkar chuan hri kai hmuh chhuah an pun chak chhan hi test an neih tam vang niin a sawi. 

Health minister Himanta Biswa Sarma chuan Guwahati khawpui bakah, Jorhat leh Cachar district-ah hri kai an pun belh chak hle tih a sawi. Thawhlehnia hri kai hmuh thar zinga 570 chu Guwahati khawpui chhunga mi an ni a, hetihlai hian 167 chu Jorhat district mi niin, Cachar district-ah 159 an awm bawk. 

Sonitpur district-ah pawh hri kai hmuh thar mi 58 an awm a, hei vang hian district thuneitute chuan hri darh zel tur venna atan rapid antigen test runpui neih an tum. Sivasagar district-ah pawh hri kai an pun belh zel bawk a ni. 

Thawhlehni khan hri kai zinga paruk an thih belh  leh a, anni nen he hripui vanga thi hi Assam-ah hian mi 64 an tling tawh a ni.