Manipur-a Thoubal district-ah complete lockdown puang
Manipur-a Thoubal district chhungah tualchhung mi, tun hnaivaia state pawn lama zin chhuahna nei lo zingah Covid-19 kai hmuhchhuah an awm a, hei vang hian hri a kai dan chhui chian a nih theihna turin Thawhlehni aṭang khan district pumah complete lockdown puan nghal a ni.
Chief secretary Dr J Suresh Babu chuan July 27 thleng complete lockdown hman a nihna tur thupek hi Thawhlehni khan a tichhuak. Hemi hun chhung hian DC-in phalna a pek, essential service ho bak chu pawn chhuah khap a ni a, district kaltlang pawh hi phal a ni lo bawk.
Official-te chuan Thawhlehnia sample endik zingah district chhunga mi 25 in hri an kai tih hriat a nih thu an sawi. An zingah hian pawn lama zin chhuahna nei lote an tel avangin hri darh zel tur venna atan complete lockdown puan nghal a ni.
District chhunga hmun eng emaw zat chu containment zone-ah a hmain puan a lo ni tawh bawk a ni. Assam ramri, Jiribam district-ah chuan July 5 aṭang khan complete lockdown puan a lo ni tawh bawk. Manipur-ah hian Covid-19 kai hmuh chhuah tawh hi mi 2,015 an awm tawh a, an zinga 1,394 chu enkawl dam an ni tawh thung. Hri thihpui an la awm lo a, enkawl mek 631 an la awm.