Tripura University acting VC lakah FIR thehlut

Tripura University-a acting vice-chancellor, M.K.Singh chu Covid-19 protocol palzuta puhin a lakah FIR thehluh a ni. FIR thehluttu hi University-a senior professor, Kashinath Jena a ni a, Amtali police station-ah complaint hi a thehlut a ni. FIR a thehluhah hain Jena chuan acting VC Singh-a fapa hi  kar liam taa south India lam aṭanga Tripura an rawn let hnuah Covid-19 positive a ni tih hriat a ni a, mahse VC hian a fapa chungchang hi zepin, varsity-ah a kal lui a; zirtirtu, zirlai, official leh an mi chhawr dangte pawh a hmu kual niin a sawi. Midangte a hmuh kualnaah hian face mask pawh a vuah lo tih a sawi bawk. 

Trpiura-a hian Covid-19 kai hmuh chhuah hi mi 3,348 an awm tawh a, Thawhlehni khan kai hmuh chhuah thar mi 245 an awm belh leh a ni. Hri kai zinga pakhat chu Thawhlehni vek khan thiin, he hri thihpui hi mi pariat an awm tawh.