Manipur : Assam Rifles lakah lungawi lohna lantir

Manipur-a Indo-Myanmar border area-a cheng, Ukhrul leh Kamjong district-a khaw pakuaa tualchhung mite chuan Thawhṭanni khan an khuaa Assam Rifles-ten camp an din luih avangin lungawi lohna an lantir.

Kangpat Khullen, Chatric, Ramphoi, Lamlang, New Tusom, Khamasom, Mapum, Kasom Khullen leh Poi khaw mite chuan Assam Rifles hian phalna la hmasa loin an ram luahsakin, camp an din niin an sawi.

Tangkhul pawl hrang hrang, Tangkhul Naga Long (TNL), Tangkhul Naga Wungnao Long (TNWL), Tangkhul Shanao Long (TSL), Tangkhul Katamnao Saklong (TKS), Tangkhul Mayar Ngala Long (TMNL) leh pawl dang pali hmingin lungawi lohna hi lantir a ni.

TNWL president SA Ramgnaning chuan Armed Forces (Special Powers)Act (AFSPA),1958 hmangin sorkar chuan border village hrang hrangah security force-te a dah lui a, he Act leh security force dah ṭhin hian tualchhung miteah hlauhna a siam a, a bikin hmeichhiate rilru a ralmuang lo zual niin a sawi.

"Naga politics talk neih mek a nih laiin, engvangin sorkar laipui chuan Imphal Valley-ah chauh AFSPA hi a hlih a, state pum aṭanga a hlih mai loh?' tiin a zawt. Assam Rifles-te chuan an ram te luahsakin, camp an siam dawn hian ram neitu leh khawtlang hotute phalna pawh an la lo a ni, a ti. Hemi chungchangah hian chief minister N Biren Singh leh union defence minister Rajnath Singh hnenah pawh memoradum an thehlut tawh a, mahse tun thlengin chhanna an la dawng lo tih a sawi bawk.

September 15 hian Ukhrul district headquarters-ah lungawi lohna lantirin rally pui tham tak huaihawt an tum a, prime minister Narendra Modi hnenah memoradum an thehlut nghal tur thu Ramganing chuan a sawi.