Meghalaya : Jail tangte tlanchhuah dan leh tihhlum an nih dan chhui dawn

Meghalaya sorkar chuan Jowai jail aṭanga tang paruk an tlanchhuah leh, West Jaintia Hills district-a khawtual miten an zinga pali an sawisak hlum dan chungchang chhuitu pahnih a din tih state home minister Lakhmen Rymbui chuan a sawi.

Minister chuan September 10-a district jail aṭanga tlanchhuak, an thubuai ngaihtuah mek mi pathum leh thiam loh chantir tawh mi pakhatte, Pathiannia sawisak hlum an nihnaah khan tualchhung mi 5,000 vel zet an inhnamhnawih a ni, a ti.

Additional superintendent of police chu jail aṭanga tangte tlanchhuah chhante chhui tura tih niin, additional district magistrate PK Boro chu jail aṭanga an tlanchhuah theih dan chhui tura tih a ni bawk. Officer dang, MA shallam chu civil hospital doctor-ten tang tlanchhuakte hi damdawi-ina hruai an nih hian an thi tawh tia an puan chungchangah, an chunga thil thlengte chhui chiang turin sorkar chuan a ruat tih Minister chuan a sawi.

Jowai jail-a head warden C Kynjing, jail official pathum leh subordinate staff pakhat chu tang tlanchhuah kaihhnawihah hian man an ni tawh bawk.

Police-te chuan jail aṭang hian mi paruk tlanchhuakin, an zinga panga chu Pathianni khan Shangpung khuaah an kal a, khawchhung miten tang tlanchhuak an ni tih an hriatin umin an bei zui a, an zinga pali an sawisa hlum a, pakhat erawh chu a tlanchhe hman a ni. Tang tlanchhuak dang pakhat erawh chu a chin hriat a ni lo.