China-in bulldozer-te ko kir : India
India leh China-te chuan Doklam-a an sipaite hnukkir an remtih thu tarlan a nih hnuah, China chuan India-Bhutan-China tri-junction-a bulldozer-te chu a ko kir mek niin India chuan a tarlang.
Thawhṭanni khan India leh China-te hian Doklam-a an sipaite an hnukkir ṭan nia tarlan a ni. Hemi chungchangah hian External Affairs Ministry chuan thuchhuah a siam a, ram pahnihte chuan sipai hnuhkir hi an remti thei ta niin a tarlang. Ministry official chuan Doklam chungchangah hian ram pahnihten inbiakna an kalpui reng a, tunah chuan inremna hi an siam thei ta tih an sawi. Inremna siam a nih tak avang hian China chuan ramria a sipaite leh, kawngpui siamna atana a hman bulldozer-te a hnukkir mek niin a tarlang bawk. Hetihrual hian China chuan,"India chuan Doklam-a a sipaite hnuhkir a remti ta a ni" tiin a tarlang a, a sipaite a hnuhkir ve dawn leh dawn loh a tarlang lo thung. Chinese Foreign ministry thupuangtu Hua Chunying chuan an ram sipaite chu an tihdan ṭhin angin ramriah an la patrol reng tih a sawi a, China chu a dinna ngaiah a ding reng dawn a ni, a ti bawk.
Hua Chunying chuan,"August 28 aṭang khan India chuan ramri aṭangin a sipaite a kokir a, a bungraw chhawpte pawh a la let a ni" a ti. China sipaite chuan ramri an la chhuahsan loh thu sawiin, boruak awmdan an thithlai reng dawn tih a sawi.
Doklam-ah hian June thla tir aṭang khan ram pahnih sipaite hi an inep ṭan a, an boruak a ṭhat loh avangin ram pahnihte hian sipai 3,000 vel ve ve an tirhluh belh nia tarlan a ni. Tun thla tir lam khan sipaite hi picturesque Pangong Lake, Ladakh-ah an ninawrbuai leh a, hliam tuarte pawh an awm nia tarlan a ni. Delhi chuan he buaina chhuak hian darkar hnih vel a awh tih sawiin, India rama rawn luhtum China sipaite te chu an lo dang tih a tarlang. Ram pahnihte hi ramriah hian thla thum dawn an inep tawh a, hetih lai hian China chuan Indo-China border-ah a sipai dah chu tihtlem tumna a neih loh thu a tarlang. India-China border hi km 3,500 zeta thui a ni a, vawi eng emaw zat buaina a lo chhuak tawh ṭhin a ni.