Meghalaya : Independent MLA-te'n Congress thlawpna hlipin BJP zawm

Meghalaya-a Inde­pendent MLA pahnih chuan Congress party an thlawpna sutin, BJP an zawm tih Thawhṭannni khan an sawi.

Meghalaya-ah hian Congress kaihhruai Me­ghalaya United Alliance (MUA) sorkara ding mek a, heng Independent MLA pahnih pawh hian MUA sorkar hi an thlawp a ni. Hetih lai hian Congress kaihhruai sorkar an thlawpna an hlih thu leh, BJP an zawm thu hi Thawhṭanni khan an tarlang a ni. Chief Minister Mukul Sangma-a kaihhruai sorkarah hian Independent MLA pahnih - Justine Dkhar leh Robinus Syngkon-te hian dinhmun pawimawh tak an chelh a, parliamentary secretary an ni. Mahse tun hnaia khan New Delhi-ah kalin BJP hruaitu lawkte nen meeting an nei a, BJP hi zawm an remti ta a ni.

Bharatiya Janata Party (BJP)-a lawmluhna hi New Delhi-ah hian neih nghal a ni a, he hunah hian BJP National President Amit Shah, National Ge­neral Secretary in-charge North East Ram Madhav, Assam Finance Minister leh North East Democratic Alliance Chairman ni bawk Himanta Biswa Sarma-te pawh an tel a ni. State BJP Vice Pre­sident J.A.Lyngdoh chuan Independent MLA pahnih­ten an party an zawm chu lawmawm a tih thu sawiin, Meghalya-in nakkuma assembly election a hmachhawn hunah pawh hmabak an nei eng hle niin a sawi.