Assam : Tuilian avangin mi pakhat thi leh MP sorkarin CM Relief fund-ah vbch 2 hlan

Assam-a tuilian chuan ziaawm lam a pan zel a, harsatna tawk pawh district pali chiah an awm tawh. Hetih lai hian tun hnai khan mi pakhat a thi ve leh. Tuilian tuarte ṭanpui nan hian Madhya Pradesh sorkar chuan chief minister relief fund atan cheng vaibelchhe hnih a hlan.

Tuilian hian district pali tan harsatna a la thlen a, Morigaon district-ah chuan mi pakhatin nunnna a chan ve leh a ni. Assam State Disaster Management Authority (ASDMA) chuan kumin chhungin tuilian vanga nunna chan 158 an awm tawh thu a tarlang. ASDMA chuan Chirang, Morigaon, Nagaon leh Karbi Anglong district-a cheng mi nuai khat velin harsatna hi an la tawk tih sawiin, Morigaon leh Nagaon district chu tuilian tuar tamna an ni.

Tun dinhmunah tuilian hian district pali-a khaw 288 chu a la chim a, thlai chinna hmun ram hectare 12,000 vel zeta zau a la chim bawk. ASDMA-in a tarlan danin relief camp leh distribution centre 70 vel a hawn a la ni a, heng hmunah hian chenna tur nei lo mi 21,049 vel an la khawsa mek a ni. Chhawmdawl hna pawh ngawrh taka kalpui zui zel a la ni a, chhun zan zawmin hna thawh a ni. Chenna nei lo mi tam takte awmna tura sorkarin a ruahmanah te ei leh in tur sem hna kalpui a ni a, damdawi leh hrileng laka invenna tur pawh sem a ni. ASDMA offical-te chuan ruah a sur tawh loh chuan tuilian hian ziaawm lam a pan chhoh zel an beisei thu leh, nunphung pangngaia mipuite an awm leh thuai an beisei thu an sawi.

Assam mipuiten tuilian avanga harsatna nasa tak an tawh mek lai hian ṭanpuina pe pawh an pung zel. Madhya Pradesh chuan Assam Chief Minister Relief Fund-ah mamawhna apianga hma nturin ṭanpuina sum cheng vaibelchhe hnih a hlan. Prime Minister Narendra Modi chuan ram chhunga state hrang hrang chief minister-te chu tunhnai khan New Delhi-ah meeting a neihpui a, Assam sorkar hnena ṭanpuina pe tur hian a lo ngen tawh a ni.

Ṭanpuina sum hi MP Minister of State for Cooperatives Vishwas Sarang chuan Chief Minister Sarbananda Sonowal kutah a hlan a, Assam mipuite harsatna tawh chu an tawrhpui thu a hrilh. Minister Sarang chuan an state chief minister Shivraj Singh Chouhan chuan Assam mipuiten tuilian vanga hun rei tak chhung harsatna an tawk chu a tawrhpui tak zet tih sawiin, a hmalakna avanga ṭanpuina pawh pe an nih thu a sawi bawk. Chief Minister Chouhan hian Assam CM Sonowal chu phone-in a lo be tawh a, chhiat tawkte a tawrhpui takzet thu a lo hrilh tawh a ni.

Assam-ah hian June thla tir lam aṭang khan tui a lian ṭan a, tuilian hian ziaawm lam pan ve ṭhin bawk mah se ruahtui a tlak tam avangin tun thlengin harsatna hian kian tak tak a la nei lo. Tuilian vanga chhiatna hrang hrang thlengah hian mi 158 zetin nunna an chan tawh a, thi zinga a tam zawk hi tuia tlahlum niin, current man hlum eng emaw zat an awm. Thi zingah hian zirlai naupang eng emaw zat an tel a, hei hi state sorkar pawhin pawi a tih thu sawiin, tuilenna hmun hrang hranga school eng emaw zat chu a khar hial a ni.

Sorkar laipui chuan tuilian tuarte ṭan­puina leh chhawmdawlna tur hian cheng vaibelchhe 1000 chuang a pe a, Prime Minister Narendra Modi chuan tuilian avanga harsatna tawkte a tlawh kual ṭumin PM Relief Fund aṭangin vaibelchhe 10 a pe bawk. Heng bakah hmun hrang hrang aṭangin ṭanpuina a lut a, mahse an harsatna tawh hi a nasat em avang leh, infrustructure chhia a tam avangin ngaiawh leh tur chuan hu a duh rei deuh dawn a ni. Kumina tuilian hi Assam-in tuilian avanga harsatna a tawh tawhah chuan a nasa ber pawl nia ngaih a ni.

Hydrological data tarlan phut :

Hetih lai hian Assam sorkar chuan India leh China-te'n Brahmaputra lui tui an insem chungchanga hydrological data tarlang turin sorkar laipui a lo ngen tawh a, ruahtui tla leh tuilen nasat dan chu a inmil lo niah a ngai a ni. Sorkar thupuangtu Himanta Biswa Sarma chuan kumin May 15 aṭang khan China sorkar chuan hydrological data hi India a hriattir tawh lo nia sawiin, Ministry of External Affairs (MEA) chu hemi chungchang sawifiah tur leh hma la tura an phut thu a sawi. Sarma chuan August 8

aṭanga tuilian an tawrh leh chu ruahtui tlak tam vang a ni lo tih sawiin, harsatna an tawh chhanah hian Brahmaputra lui hnar lama China tuikhuah aṭanga tui luang chhuak a tam vang a nih theih thu a sawi. Sarma chuan, " Assam-a tuilian hi Brahmaputra lui len vang a ni a, a hnar lam aṭanga tui rawn luang lut a tam hle a ni. Hei hi a chhan finfiah a ngai a, India-China hydrological data hi mipui hriata tarlan kan phut a ni" a ti.

Hemi chungchangah hian sorkar laipui chu a rang lama hma la tura an phut thu sawiin, Brahmaputra lui hnar lama China tuikhuah aṭanga tui chhuak zat chu finfiah thuai an duh tih a sawi. Kum 2006 khan India-China Expert-Level Mechanism-ah China chuan tuikhuah aṭanga tui luang chhuak zat hi India hriattir turin inremna siam a lo ni tawh a, inremna ang chuan China chuan Brahmaputra leh Satluj lui hnar lama tuikhuah a siam aṭanga tui luang chhuak zat, hydrological data chu kumtin May 15-October 15 chhungin India a hriattir tur a ni. Mahse hei hi China chuan zawm loin kuminah pawh hydrological data hi India a la hriattir lo nia sawi a ni.

Sarma chuan Brahmaputra lui hnar lamah ruah a sur nasatin ni hnih thum te tui a lian an tawrh ṭhin thu sawiin, tun ṭuma tuilian an tawrh erawhin hun a awh rei tawh hle tih a sawi. Assam leh Arunachal Pradesh-a tuilian chui khawi aṭanga lo kal zozai nge hriat a nih loh thu a lo sawi tawh bawk.

Assam-a tuilian hian district 33 zinga 28-a cheng mi nuai 25 vel zet tan harsatna a thlen a, mihring bakah nungcha ṭhahnem takin nunna an chan tawh a ni.