Assam : Assembly aṭangin Congress member-te chhuak

Assam legislative assembly rorel inkhawm neih mekah, Thawhlehni khan Question Hour-a supplementary question zawh hun tihtawi a nih avangin eptu party, Congress member-te chu lungawi loin House aṭangin an chhuak.

Assembly speaker Biswajit Daimary chuan dan ang takin House rorel chu kalpui a ni tiin, Thawhṭannia business advisory committee (BAC) meeting rel angin Thawhlehni khan Question Hour-a supplementary question zawh leh chhanna hun atan minute nga ṭheuh hun a pe a ni. A hma chuan main questioner bakah, MLA pahnih chu zawhna an zawh belh phalsak niin, hun bituk a awm lo bawk.

Deputy leader of opposition Rakibul Hussain chuan BAC meeting-ah Question Hour chungchang an sawiho loh thu a sawi thung. Hussian hi BAC-ah hian Congress aiawhin a tel a ni. "BAC meeting hi House-a rorel inkhawm tluang taka a kal theih dan ngaihtuaha koh a ni. Zero Hero-ah thusawitu tan minute nga zel pek chungchang kan sawiho a, Question Hour lam erawh engmah kan sawiho ka hre lo," a ti.

BJP sorkarin session neih ni, ni 45 aṭanga ni 26-a tihtlem chungchang pawh sawichhuakin, "Eptute lam thusawi tir leh an thusawi ngaihthlakte hi an duh lo ni berin a lang," tiin Hussain chuan a sawi bawk.

Leader of opposition Debabrata Saikia chuan eptu lam tan House-ah ṭawngchhuahna hun a tam lo a, Question Hour hi an tan a pawimawh hle tih a sawi. Speaker chu main questioner ni lo, zawhna zawh belhtute chu minute 10 zel hun pe turin a phut.