Tripura Youth Congress president-in beih a tawk

Tripura Pradesh Youth Congress President Rakhu Das chu Thawhlehni zan khan Sepahijala district-a Bishramganj area-a hun an hmanaah BJP thlawptu nia sawiten beiin, a car pawh an khawih tel bawk.

Das chuan rally an neih zawha an meeting-na hmunah BJP thlawp, misualte hian beiin an party senior leader, Moumita Kali pawhin hliam a tuar niin a sawi. A car bakah motor dang emaw zat chu BJP worker-te hian an suasam tel thu a sawi.

Congress-in rally an huaihawt hnu hian Congress leh BJP worker-te inkarah buaina a chhuak nia sawi a ni a, police leh TSR sipai eng emaw zat tirh an ni. Das chuan BJP worker lamin khawih an tum avanga tlanchhia, building-a Congress worker eng emaw zat tawmkhawmte chu police-te chuan venhim leh chhanchhuah pawh an tum lo niin a sawi bawk.