NSSB-a viva-voce tana12.5% dah Naga zirlaiten duh lo

Nagaland Staff Selection Board (NSSB)-in tun hnaia hna lakna tur advertisement a tihchhuahah, category zawng zawngah total mark aṭanga 12.5% viva-voce/interview tana dah a ni chu Naga Students' Federation (NSF) chuan an duh lo tih an sawi.

Thawhlehni khan Kohima-ah press conference neiin, NSF president Kegwayhun Tep chuan chief minister Neiphiu Rio kaihhruai sorkarin NSSB a kalpui chu lawmawm an tih thu a sawi. Hemi rual hian examination kalpui danah dik lo a awm tur a ni lo, a ti.

"NSF bakah zirlai pawl hrang hrangten NSSB din tura an beihna chhan chu, examination buatsaihah dik tak leh langtlang taka thil kalpui a nih theihna atan a ni," a ti. Mahse board-in advertisement a tihchhuahah, viva-voce/interview tan total mark aṭanga 12.5% a dah hi hman sual theih a ni dawn tih a sawi.

Board thiltih dan hi an duh loh thu pawh state chief secretary hnenah ziakin an thlen tawh tih Tep chuan a sawi. "Viva-voce dah pawimawh lutuk hi thuneitu lamin an thuneihna dik lo taka an hmanna remchang a siamsak thei dawn a ni. Hei hian NSSB din a nihna chhan ber, langtlang leh dik taka hna lak kalpuina tur chu a rawn tichhia a ni," tiin zirlai pawl chuan an sawi a ni.