Manipur CM-in kangṭhelh motor 11 vailiam

Manipur chief minister N Biren Singh chuan Nilaini khan Manipur Fires Service Department-in district hrang hranga a pek tur, kangṭhelh motor thar 11 leh hmanraw dangte chu Imphal aṭangin a vailiam.

Kangṭhelh motor hi Imphal, Thoubal, Moreh,Bishnupur, Tamenglong, Jiribam, Senapati, Kangpokpi, Ukhrul leh Churachandpur district-te hman tur a ni.

Chief Minister chuan mipuite hnenah ngenna siam nghalin, chhiatna leh harsatna a thlen palh thulha emergy motor-te tlan theihna turin tualchhung kawng leh bylane-te chu tizau ṭha tur leh, veng tinah water pond nei vek turin a ngen.

Kangmei chhuak leh emergency dangah, kawng zim lutukah kangṭhelh motor liante tan tlan a harsa ṭhin a, hei vang hian veng tinah motor lian tlan theihna tura kawng zauh a ṭul thu a sawi. Hemi atan hian sorkar chauh ni lo, mipuite pawhin hma an lak a ngaih thu a sawi bawk. Khawtlang ṭhatna tura theihtawp chhuah zel turin mipuite a chah a, midangte sawisel loa, khawtlang tana tha an thawh theih dante mahni inzawt zawk ṭhin turin a ti.

State pumah kangṭhelh motor 64 vel awmin, 11 an neih tharte chu technology thar nena thuam a ni tih CM chuan a sawi bawk, mipuite himna atana thawktu kangṭhelhtute chu fakin, theihtawp chhuah zel turin a chah.