Dalai Lama'n Sikkim a tlawh dawn

Tibet sakhaw hotu, Dalai Lama chuan October thla hian Sikkim state tlawh a tum a, hei hi kum 2010 hnua a tlawh lehna hmasa ber tur a ni.

Ecclesiastical Minister Sonam Lama kaihhruaiin Sikkim aiawhte chuan Sikkim aṭanga Dharamshala, Himachal Pradesh-ah kalin, Nilaini khan Dalai Lama hi an hmu a, zin tur hian an sawm a ni. Minister chuan, "Dalai Lama hian Sikkim tlawh a chak thu sawiin, kan sawmna min lo pawmsak a, kan lawm hle a ni. Zin tura kan sawm avanga lawmthu min hrilhin, Sikkim mipuite dinhmun min zawt bawk, " tiin thuchhuah a siamah a tarlang.

Sikkim chief minister Prem Singh Golay pawhin social media-ah Dalai Lama'n an state a tlawh tur thu hi ziaklang ve bawk.

Kum 86 mi, Buddhist sakhaw hotu Dalai Lama hian Sikkim a tlawh ṭum rukna tur a ni a, October 28-ah thlengin November 1 thleng a cham ang. Dalai Lama hi Vajrayana Tibetan Buddhism-a Gelugpa sect hotu niin, Sikkim-ah zuitu ṭhahnem tak an awm. Kum 2018 khan Sikkim tlawh hi a lo tum tawh a, mahse a hriselna ṭha tawk loh avangin a ṭhulh leh a ni.