Tripura : Indo-Bangla railway link zirchianna zo

Tripura kaltlanga rel hmanga India leh Bangladesh inkalpawhna tur pahnihna zirchianna neih chu zawhfel a ni ta.

Indo-Bangla railway link hi South Tripura-a Belonia khua leh, Bangladesh-a Feni khaw inkara siam tum a ni. Survey zawhfel a nih hnuah, Railway Board hnenah a ṭul ang tifel turin thawn a ni tawh tih North East Frontier Railway (NFR) chuan a sawi.

NFR general manager Anshul Gupta chu railway project endik tur hian Tripura-ah a kal a, Agartala railway station-ah chief minister Dr Manik Saha nen inhmuin, Agartala-a railway infrastructure thar din tur chungchangte an sawidun a ni. GM chuan CM hnenah thuneitu sang lamah Tripura kaltlanga Indo-Bangla railway link pahnihna siam tur pawh hi an thlen tawh tih a hrilh. Hei bakah Agartala railway station chu world-class facility-a siamchhoh an tum dan te, food court, cafeteria, shopping mart leh thil dang dah an tum dante a hrilh bawk.