Manipur : Ukhrul-ah Assam Rifles leh AFSPA duh lohna lantir

Manipur-a Ukhrul district headquarters-ah Ningani khan Assam Rifles-te camp siam leh, sipai hnena thuneihna sang pekna Armed Forces (Special Powers) Act,1958 (AFSPA) duh lohna lantirin mipuiten kawng an zawh.

Kawngzawh hi Tangkhul civil society-te huaihawt niin, Ukhrul leh Kamjong district-a khaw pakuaa Assam Rifles-te camp siam chu ṭhiat tur leh, an state pumah AFSPA hlip turin an phut.

Rally-a telte hian Indian Army chu an khua aṭang chhuak tura an phutna thu te, an dikna chanvo humhalh an tum thu leh, boruak muanawm a awm an duh thute an aupui a ni.

Tangkhul civil society organisations (CSOs) chuan vantlang hmun, playground, school leh children's home, community hall-te chu Assam Rifles-te chuan camp atana an luahsak tih sawiin, hei hi nunphung pawh a tihbuai phah a ni, an ti. Hei bakah security check post-te siamin, tualchhung mite endik an ni fo bawk niin an sawi.

AFSPA hmangin sipaite hi thuneihna sang pek an nih avangin an inluling a, a bikin hmeichhia leh naupangten an thlabar phah hle tih an sawi bawk.

Kar liam ta khan Ukrul district-a Khamasom, Mapum, Poi, Tusom CV leh Lamlang khuate leh, Kamjong district-a Kangpat Khullen, Chatric, Ramphoi leh Kasom Khullen khaw mite chuan an khuaa AR-in camp an siam duh lohna hi anmahni khua ṭheuhah an lo lantir tawh bawk a ni. Sipaite hian a tualchhung mite leh khawtlang hotute remtihna engmah la loin camp hi an siam nia sawiin, an khua chhuahsan turin an phut.