Sorkar laipuiin Assam-a tribal helpawl 8-te inremna ziahpui

Sorkar laipui, Assam sorkar leh Adivasi tribal helpawl pariatte chuan Ningani khan inremna an ziak.

Inremna hi New Delhi-ah ziah a ni a, union home minister Amit Shah leh Assam chief minister Himanta Biswa Sarma pawh an tel an ni.

Sorkar nena inremna ziakte hi Birsa Commando Force (BCF), Adivasi People’s Army (APA), All Adivasi National Liberation Army (AANLA), Adivasi Cobra Military of Assam (ACMA), Santhali Tiger Force (STF) leh BCF, AANLA leh ACMA aṭanga pawl dang dinte an ni. Heng pawlte hian kum 2012 khan inkahhai puang tawhin, an puala camp siamah an khawsa mek.

Assam-ah hian Paresh Baruah kaihhruai leh Kamatapur Liberation Organisation tih loh, helpawl langsar dangte chu sorkar chuan inremna a lo siampui tawh hlawm a ni.

January thla khan Tiwa Liberation Army leh United Gorkha People's Organisation member-te chu sorkarah an ralthuamte nen an inpe a, nikum August thla khan Kuki Tribal Union helpawl pawh sorkarah an lo inpe tawh bawk.

Kum 2020, December thla khan Bodo helpawl, NDFB member 4,100 vel chu an ralthuamte nen thuneitute kutah an inpe bawk a ni.

Union home minister Amit Shah chuan hmarchhak-a remna leh muanna a awm theihna turin sorkar laipui chuan theihtawp a chhuah zel a, hmarchhak state hrang hrangten ramri buaina an neihte chu kum 2024-ah chinfel vek hman tum a ni tih a sawi.