September 23 aṭangin Assam-Bhutan border hawng dawn

Assam-Bhutan border chu Covid-19 hri leng vanga hun rei tak khar a nih hnuah September 23 aṭangin hawn ṭan a ni leh dawn ta.

Bhutan-a ministry of home and cultural affairs director, Tashi Penjore kaihhruai palaite chuan Assam tlawhin, Kokrajhar-ah Bodoland Territorial Council (BTC) official-te nen meeting an nei a ni. Meeting-ah hian Assam ramria Samdrup Jhongkar leh Gelephu-a border gate chu September 23 aṭangin hawn a ni tawh dawn tih Penjore chuan a sawi.

Penjore chuan, "Kum hnih leh a chanve chhungin ram pahniha official-te pawh an inthlak chho a, mahse border gate-te khar a nih avangin intlawhpawh leh indawr mumal thei loin kan awm reng a ni," a ti. Border gate-te hawn a nih dawn tak avangin India mite chu Bhutan ram tlawha zin turin a sawm nghal bawk.