Bhaichung-a'n Sikkim-a IPL hman phut

India football captain hlui, Hamro Sikkim Party (HSP) founding president Bhaichung Bhutia chuan Sikkim special status pekna, Constitution-a Article 371 (F) venhimna atan an state-a Inner Line Permit (ILP) system hman a phut.

Bhaichung Bhutia chuan state mipuite chu IPL hman a nih ve theihna atana lungrual taka aw chhuah turin a ngen.

Ningania Gangtok-a chanchinthar lakhawm­tute a kawmnaah, " Article 371 (F) venhimna tur awmchhun chu ILP kan hman hi a ni," tiin a sawi.

"State pawn lam mi tam tak Sikkim-ah khawsain, heng mite hian Certificate of Identification (COI) lem hmangin Electoral Voter Identity Card (EPIC), ration card leh Aadhaar Card te an nei a, hei hian state leilung fate dikna chanvo neihte a tiderthawng a ni," a ti. An state chu ram pathum - China, Bhutan leh Nepal nen an inri avangin, security lam thilah pawh ILP hman chu a ṭul thu a sawi bawk.