Narendra Modi-a'n Bodo Peace Accord lawmna hmanpui
Prime minister Narendra Modi chuan nimin khan Assam a tlawh a, Bodo Peace Accord lawmna hun a hmanpui.
Sorkar laipui, Assam state leh Bodo helpawlte chuan January 27 khan inremna an ziak a, hei hi kum 1993 hnu lama inremna an ziah ṭum thumna a ni. Bodo Peace Accord lawmna hi nimin khan Kokrajhar-ah an nei a, he hun hmanpui tura an sawm angin PM hi a zin a ni.
Bodo Peace Accord ziah hnu hian Bodo helpawl, National Democratic Front of Bodoland hnuaia pawl pathuma hel 1,615 chu sorkar kutah an inpe tawh a, silai 178 leh silai mu 4,893 an thehlut tel.
PM Modi hian sawisel hlawh tak, Citizenship Amendment Act (CAA) siam a nih hnua Assam a tlawhna hmasa ber a ni. Assam-ah hian CAA duh lohna hi nasa taka lantir a ni a, tharum thawhnate thlengin mi pathumin nunna an chah phah hial. January thla khan PM hi Khelo India Games hmanga Assam tlawh tura sawm a lo ni tawh a, mahse CAA duh lohna lantir nawrh huaihawtna hluar chhoh lai a nih avangin PM chuan he sawmna hi a hnar a ni.
Bodo Peace Accord lawmna pualin Ningani zan khan Kokrajhar-ah bati nuai khat chhiin boruak muanawm a awm zel theihna turin mipuiten ṭawng-
ṭaina hun an hmang a, ABSU leh NDFP chuan bike rally an huaihawt bawk.
Nimina Kokrajhar-a rally buatsaihah hian tel an ṭhahnem hle a, hmun tam takah inremna siam a nih avanga PM chunga an lawmthu sawina thuziakte tarlan a ni.
PM Modi hi Assam chief minister Sarbananda Sonowal leh governor Prof. Jagdish Mukhi ten lo dawngsawngin, helicopter-in Kokrajhar lam panpui nghal a ni. Mipui pungkhawmte hmaa thu a sawiah, PM chuan India rampum chuan Bodo hnamte chu inremna an siam theih avanga an lawmpui thu sawiin, he inremna siam a nih theih chhan chu Bodo hnam mimal tin ten boruak ṭha leh muanawm a awm an duh vang a ni, a ti.
Tharum thawhna leh boruak ṭha lo thleng tawh ngai lo se a duh thu sawiin, helna avangin mi tumahin an chhung leh lainate chan tawh lo se a duh thu a sawi. Kokrajhar-a mipui ṭhahnem tak an pungkhawm chuan a tilawm hle tih sawiin, hei hi India independence hnua political rally lian ber a nih hial a rin thu a sawi.