Border area chungchangah dawt sawiah Assam minister puh

Assam-a Gorkha organisation chuan Assam minister Atul Bora chu Boko district-a Lumpi khuaa chengten Meghalaya lama beh an duh nia a sawi chu thu dik lo nia sawiin, minister chu dawt sawiah an puh.

Atul Bora hian Assam legislative assembly autumn session neihah khan, Lumpi bial a tlawh thu leh, he biala chengten Meghalaya lama beh an duh thu a sawi a ni. Atul Bora hi Assam-Meghalaya ramri buaina chinfel dan tur ngaihtuah tura cabinet sub-committee dinah chairman ni lai a ni.

Kamrup Zilla Gorkha Kalyan Samiti leh Gorkha Students’ Union (GSU), Lumpi regional Unit chuan press conference-ah minister thusawi hi chhangin, Lumpi biala cheng tam zawk chu Gorkha hnam niin, Gorkha hnamte chuan Meghalaya lama beh an duh ngai lo tih an sawi. Assam sorkarin an chenna bialte ngaihven ṭha tawk lo mah se, Gorkha hnamten Assam sorkar an thlawp ṭhinte pawh tarlan tur an neih thu sawiin, Minister-in Meghalaya lama beh an duh zawk nia a sawi chu mak an ti hle tih an tarlang.

"Gorkha pawl hrang hrang chuan September 10, 2022 khan Atul Bora hi hmuin, Lumpui area-a chengte chuan Assam an thlawp zel tur thu leh, Assam lama awm zel an duh thu an hrilh a ni. Minister Atul Bora leh a kaihhruai cabinet sub-committee pawh chu Lumpi area tlawh a, mipuite ngaihdante pawh va hre turin kan ngen a ni," an ti.