Sikkim MLA-in CAA hman hmaa ILP resolution pass a duh

Sikkim-a BJP MLA Dilli Ram Thapa chuan sorkar laipuiin Citizenship Amendment Act (CAA) hmanna tur thuchhuah a siam hma ngeiin, an state-a Inner Line Permit (ILP) system hman a nih ve theihna atan resolution pass a duh thu a sawi.

MLA Thapa hian Sikkim legislative assembly session-ah he thu hi a sawi a ni. Parliament-a CAA ngaihtuah a nih lai khan, union home minister Amit Shah chuan ṭawngkamin Sikkim-ah CAA chu hman a ni ve dawn lo tih a sawi thu sawichhuakin, Thapa chuan, "Mahse hei hi ṭawngkam ringawt a ni. Hei vang hian state sorkar chu CAA hmanna tur thupek a chhuah hma ngeiin, Sikkim-a ILP hman a nih ve theihna atana sorkar laipui nawr a, resolution pass turin kan ngen a ni. MLA-te kan inlungrual vek a ngai a, Sikkim-a ILP hman a nih ve theihna tur ngaihtuah turin special session pawh ko turin ka ngen bawk a ni," a ti.

State pawn lam aṭanga Sikkim-a rawn pem lutte enfiahna mumal tak a awm loh thu sawiin, Thapa chuan, "Kum 15-20 liam ta chhunga pawn lam mi, inhlawhfa tura rawn lutte record mumal a awm lo. Kan state-ah hian a leilung fa aiin pawn lam aṭanga rawn pem lut an tam zawk. 2011 chhiarpuiah, Sikkim mipui chu nuai 6 vel angin tarlan a ni a, mahse hetah hian tunge a leilung fa dik tak leh pem lutte tih chhinchhiahna a awm lo. One Nation One Ration Card hman a nih hnuah, inhlawhfaa rawn lutte hian an chhungte pawh an hruai lut zel tawh a ni. Heng zawng zawng hi labour law khauh taka kenkawh a nih loh vang leh, ILP kan hman ve loh vang a ni," tiin a sawi.