Nagaland : NSCN-IM in peace talk chhunzawm an remti

Nagaland-a United Democratic Alliance chairman TR Zeliang chuan National Socialist Council of Nagalim-Isak Muivah (NSCN-IM) chuan sorkar laipui nena Naga peace talk neih chu chhunzawm leh an remti tih a sawi.

State sorkarin Naga buaina chinfelna tur buaipui tura core committee-a dina co-chairman ni bawk, Zeliang chuan inbiakna chhunzawm tur hian NSCN-IM palaite chuan Delhi an pan thuai dawn tih a sawi bawk.

Inremna kawnga inbiakna an neihah NSCN-IM lamin Nagaland tana constitution leh flag hran an phut chu sorkar laipui hian a remtihpui thei lo a, hei vang hian inbiakna hi hmawr an la bawk thei lo a ni. May thla aṭang khan inbiakna hi an chhunzawm tawh lo.

Hun rei tak inbiakna a bahhlah avangin, sorkar laipui chuan chief minister Neiphiu Rio kaihhruai, core committee chu inremna tluantling siam a nih theihna atan, NSCN-IM chu sorkar nena inbiakna chhunzawm tura nawr turin a ti a ni. Hemi hnu, kar liam ta Inrinni khan NSCN-IM aiawh core committee member-te chuan Chumoukedima-ah meeting an nei a, NSCN-IM lam pawhin inbiakna chhunzawm an remtih thu hi an sawi ta a ni.

Sorkar laipui hian Naga buaina chinfelna turin kum 1997 aṭang khan NSCN-IM chu inbiakna a neihpui a, kum 2017 aṭangin Naga pawl pasarih awmkhawmna, Naga National Political Groups (NNPG) chu a hranin inbiakna a neihpui bawk. Kum 2015, August 3-ah NSCN-IM nen framework agreement ziakin, kum 2017, December thlaah NNPG nen a thuphungin inremna an siam tawh bawk a ni.

NSCN-IM in May thla aṭanga inbiakna an chhunzawm duh loh chhan chu sorkar laipuiin remna palai atana a ruat, AK Mishra thil kalpui danah an lawm lo niin Zeliang chuan a sawi. Mahse meeting an neih hnuah, framework agreement an lo ziah tawh behchhan leh, sorkar laipuiin palai atana a lo ruat hmasak tawh, Ravi paper thehlut tawhte behchhana kalpui anih chuan peace talk neih chhunzawm leh chu an remti a ni, a ti. Boruak a ṭhat chhoh a, inbiakna pawh neih chhunzawm thuai a beisei thu a sawi bawk.