Tripura : Power Engineer Association-in thupha chawi turin Dy Speaker phût

Tripura-a power engineers' association chuan deputy speaker, Biswa Bandhu Senchu engineer-te chungchang mawi lo taka a sawi avangin thupha chawi turin an phût tih an sawi.

Deputy Speaker hian kar liam ta Nilaini-a Dharmangar-a thu a sawinaah, RD leh power department-a engineer-te chu state sorkar hmel tihchhetute niin a sawi a ni. Power deparmtent leh public work kaihhnawihah complaint a lut fo tih sawiin, BJP sorkar chuan hetiang thil hi a enliam mai mai dawn lo a ni, a ti.

Power engineers association chuan thuchhuah siamin, Deputy Speaker thusawi hi sorkar ngaihdan nen a inkalh niin an sawi. "Engineers' Day lawmnaah khan Tripura chief minister Dr Manik Saha leh deputy CM Jishnu Dev Varma-te chuan sorkar project hrang hrang thawhna kawnga state engineer-te inpekna leh hnathawhte an fak a ni. Scheme hrang hrang tihhlawhtlin a nih theihna atan engineer-te hian theihtawpin an thawk a ni," an ti. Deputy Speaker thusawi chungchangah CM leh Deputy CM chu inrawlh turin an ngen nghal bawk.