Manipur chanchin ziah dawnin sorkar pawmpuina neih ngai

Manipur sorkar chuan an state history, culture, tradition leh geography chungchang ziakte chuan an lehkhabu an tihchhuah hmain, sorkarin a ruat committee hnenah pawmpuina an lak zel a ngai tih a sawi.

State higher and technical education secretariat chuan he thupek hi kar liam ta khan thupek hi a tichhuak a ni.

Sorkar chuan Manipur chanchin ziaktu ṭhenkhat chuan thu dik tawk lo leh, state chhunga hnam hrang hrang kara boruak muanawm awmte tichhe lam thei an ziak ṭhin tih hriat a nih thu sawiin, hei vang hian thu dik leh rintlak tak chauh tihchhuah a nih theina atan, heng lehkhabu lo endik hmasa tur member 15 awmna committee a din a ni.

Thuchhuah chuan, 'Mi mal emaw pawl emaw, Manipur history, culture, tradition leh geography chungchang ziahna lehkhabu tichhuak turte chuan university and higher education director hnenah an lehkhabu copy hi an thehlut hmasa phawt tur a ni. Committee chuan meeting koin a lo endik ang," a ti. Committee pawmpuina hmu loa lehkhabu tihchhuakte chu hrem theih an ni tih sorkar thuchhuak chuan a tarlang bawk.

Committee hi state education minister Th Basant Singh-a'n a ho a, member-ah hian university vice chancellor te, college leh univeristy zirtirtu te ruat an ni a, university and higher education department-a director chu member-secretary a ni.