Delhi - State Capital rel hmanga thlunzawm vek a ni ang : Rajen Gohain

Union Minister of State for Railways Rajen Gohain chuan ram chhunga state capital zawng zawng te chu Delhi aṭangin rel hmanga thlun zawm vek a nih tur thu a sawi.

Union Minister Rajen Gohain chuan,"Delhi aṭanga state capital-te thlunzawm tur hian sorkar laipui chuan ruahmanna a siam a, hei hi hmun hrang hranga thil thar chhuahte man man zawka hralh a nih theih nana hma lakna a ni" a ti. Gohain hian Nilaini khan Meghalaya khawpui Shillong-a ICAR-NER meeting a hmanpuinaah he thu hi a sawi a ni. Minister chuan, Delhi-state capital thlunzawm hi inkalpawhna atan ringawt ni lo, thlai chingtuten an thlai thar awlsam zawka an thawnchhuahna atan a ṭangkai dawn a, hei hian tourism lamah pawh nasa takin sul a su dawn a, a bik takin hmarchhak state-te tan a ṭangkai hle dawn a ni, a ti.

Minsiter Gohain chuan, Delhi aṭanga state tin khawpui rel hmanga thlunzawm a nih chuan mipui tan a ṭangkai dawn hle a, ram pawhin hma a sawn phah hle dawn a ni, a ti. Inkalpawhna a ṭhat chuan bungraw lakluh leh thawnchhuah man a tlawm phah ang a, chu chuan mi rethei zawkte tan pawh kawng a hawnsak a beisei thu a sawi. Hetih rual hian Congress party chu bei zuiin, inkalpawhna ṭha ngaipawimawh loah a puh. Meghalaya-a Congress kaihhruai sorkar chuan railway project a kalpui ṭha lo hle a, mipuite pawhin an thlawp ṭha lo niin a sawi.

Gohain chuan hmarchhak chu ei leh bara a intodelh theih nana hma lak a ngaih thu sawiin, green revolution thar­thawh leh a ngai tih a sawi. Hei hi Prime Minister Naren­dra Modi-a duhdan leh suang­tuahna pawh a nih thu a sawi bawk. Hemi tihlawhtling tur hian Indian Council of Agricultural Research (ICAR) chuan programme eng emaw zat a duan thu a sawi a, hei hi kum 2022-ah chuan zawhfel hman beisei a nih thu a sawi bawk.