Nagaland CM-in politics buaina chinfelpui turin president ngen

Nagaland Chief Mi­nister, T.R. Zeliang chuan Nilaini khan President Ram Nath Kovind chu New Delhi-ah hmuin, Naga politics buaina chinfelpui turin a ngen.

Chief Minister Ze­liang chuan hun rei tak chhung Naga political issue chinfel loha a awm chu pawi a tih thu sawiin, hmasawnna daltu a nih thu a sawi. An buaina chingfel thuai a nih theih nan President Kovind chu hma lak pui tuin a ngen. Zeliang chuan kum 2015 khan sorkar laipui leh National Socialist Council of Nagaland - Isak Muivah (NSCN-IM)-te chuan inremna an lo siam tawh tih sawiin, inremna tluantling siam tur hian inbiakna neih mumal zui a nih loh vangin tun thlengin inremna tluantling ziah a la ni lo, a ti. Inremna ziahfel thuai a nih theih nan president chu hma la turin a ngen a ni. Naga politics buaina chuan Southeast Asian ramte nen a inthlunzawmna an neihna kawngah pawh harsatna a thlen thu sawiin, Act East Policy thlenga a nghawng thu a sawi bawk.

Chief Minister hi Nagaland Lok Sabha MP Neiphiu Rio chuan a ṭawiawm a, president bakah Union Home Minister Rajnath Singh an hmu a, kumina ruahtui tlak tam avanga an state-in harsatna an tawh hrang hranga vanduaina tawkte ṭanpuina tur sum pek chhuah thuai an phut thu an thlen.