Arunachal-ah in 87 a kangral

Arunachal Pradesh-a Upper Subansiri district-ah Nilaini khan kangmei nasa tak a chhuak a, chenna-in 87 a kang ral.

Upper Subansiri district-a Daporijo khuaa kangmei chhuak hian dawr leh chenna-in eng emaw zat a man kai a, kangmei chhuahna hmun hi bazar hmun a nih avangin a darh chak hle. Kangmei chhuah chan hi hriat a la ni lo a, thi leh hliam an awm lo nia tarlan a ni bawk. Chief Minister Pema Khandu chuan kangmei chhuak chu pawi a tih thu sawiin, vanduaina tawkte a tawrhpui hle tih a sawi. Chief minister hian Upper Subansiri district, Deputy Commissioner chu a be nghal a, vanduaina tawkte chhawmdawlna ngaihtuah turin a ti. Deputy commissioner chuan kangmei chhuak avang hian chhungkaw 87 zet chu chenna tur nei loin an awm tih sawiin, an chen lailawkna tur ngaihtuah sak an ni, a ti.

Kangmei chhuahna hmun hi police, ITBP, CRPF, GREF leh mi tlawm­ngaiten an pan khawm nghal a, a ṭul ṭul an thawk a ni. Mi eng emaw zat chu DUDA market complex buil­ding-ah khawsak lailawk tir an ni a, a hnuah relief camp-ah sawn luh leh an ni. Chief minister chuan relief camp-ahte hian ei leh in tur pek chhuah nghal a nih thu sawiin, sorkar chuan vanduaina tawkte chu kawng hrang hrangin a ṭanpui tur thu a sawi.