Assam Minister-te'n tuilenna hmun tlawh dawn

Assam cabinet meeting chuan September 15 aṭang hian minister leh sorkar senior officer-te chu an state chhunga tuilenna hmun hran ghrang tlawh turin a ti.

Ningani-a cabinet thukhawm chuan hei hi pass-in, tuilenna hmun hrang hrang hi an tlawh kual ṭhin dawn a ni. Meeting kaihruaitu Chief Minister Sarbananda Sonowal chuan tuilian tuarte harsatna tawh chu a namai lo hle tih sawiin, a hmun ngeiah kal a, an harsatna hmuhpui an ngai a, hei hian mite thinlungah ṭanpui duhna leh an harsatna tawh hriathiampuina a pe thei dawn a ni, a ti. Industry Minister Chandramohan Patowary chuan Swachh Bharat Mission kalpui mek chu tuilian hian nasa takin a tibuai tih sawiin, hmun tam takah faina beihpui thlak thar leh a ngai dawn tih a sawi.

Cabinet chuan chhiat tawkte chu a theih ang anga ṭanpui a remti bawk.

Cabinet chuan Assam Petro­chemicals Limited din a remti a, hemi atan hian cheng vaibelchhe 1337 ruahman a ni a, Municipal Administration Reform Bill put luh a remti a, Assam State Capital Region bill a pawm bawk. Heng bakah hian Majuli University dinna tur te, Collge pathum - Bhattadev, Madhabdev leh Rabindranath Tagore-te University-a hlankai a remti a, khawtlanga hmeichhiate dinhmun chawikanna turin Assam State Population Bill a pawm a, Guwahti khawpuiah International Trade Centre din a remtih bakah, twin tower sak a remti bawk.