Nagaland-ah FB-a thil post vangin mi pakhat man
Nagaland-ah tun hnai khan mi pakhat chu Facebook-ah hmeichhe zahawmna tibawrhbang thei thlalak a post avangin man a ni. Cyber Crime Police-te chuan pawikhawihtu hian Facebook-ah hmeichhe pakhat nena mawi lo taka an awmdun lai a post a, complaint an dawn bawhzuiin an man ta tih an sawi. FB-a thlak post-tu hian a kawppui hmeichhiain kawppui dang a lo nei tih a hriat chhuah avangin, an pahniha an awmdunna thlalak chu phuba lak nan hmangin, midang hmuh thei turin a pho lang ta niin an sawi. Pawikhawitu lakah hian IT Act, 2008 behchhanin thubuai ziahluh a ni a, thiam loh chantir a nih chuan kum thum chhung lungin tan bakah, cheng nuai nga thleng chawi tura hrem theih a ni ang.
Police-te chuan hetiang thil hi a lo thleng fo tawh tih sawiin, complaint eng emaw zat an dawn thu leh, thubuai pawh an ziahluh tawh thu an sawi. Mipuite chu social media -Facebook, Whatsapp, Instagram, Twitter leh a dangte hman kawngah fimkhur turin an chah bawk.