Darjeeling buainain Sikkim a kangkai Sikkim-ah GJM mi leh sa kaphlum, midang pakua man

Gorkha Janamukti Morcha (GJM)-te'n state hran phut a, West Bengal sorkar laka lungawilohna an lantir chuan Sikkim state a kangkai a, kar kalta Zirtawpni khan GJM mi leh sa pakhat chu kahhlum niin, midang pakua man an ni bawk.

Hill party chuan Zirtawpni khan South Sikkim-a Namchi-ah central committee meeting an nei a, police-te nen an inkarah buaina chhuak zuiin, inkahna a thleng zui a ni. GJM General Secretary Roshan Giri chuan, Namchi-ah hian West Bengal sorkar chuan Criminal Investigation Department (CID) official-te a tir a, buaina a chhuak zui ta a ni. Buaina chhuakah hian silai hmehpuah a ni a, GJM mi leh sa pakhtin nunnna chanin, midang pakua man a ni bawk, a ti. Superintendent of Police Akhilesh Kumar Chaturvedi chuan West Bengal CID official-te'n GJM mi leh sa te an man thu hi a sawi ve bawk.

He thil thleng chungchangah hian South Sikkim SP chuan thuchhuah siamin, Sikkim Policete chuan WB CID-te lakah FIR an thehluh thu a sawi. SP chuan Bengal CID official-te chuan khualzin anga inthuamin Sikkim hi an lut a, document mumal pawh an nei lo a, heti chung hian GJM hruaitu eng emaw zat chu an man a, buaina a chhuak zui ta a ni, a ti. He thil thlengah hian Dawa Bhutia chuan vanduaina tawkin, nunna a chan tih a sawi bawk.

Sikkim Superintendent of Police Pratap Pradhan chuan, Bengal CID official-te chetdan hi a dem thu a sawi a, hriattirna an dawng lo chu mak a tih thu a sawi. Bengal CID official-te hian Sikkim Border police-te hnenah khualzin anga insawiin, Ravangla tlawh an duh thu an hrilh a, an chetdan hi an state himna tider thawng thei thil a nih thu a sawi. An chetdan avang hian Sikkim south district police-te chuan IPC section 302 tlawhchhanin thubuai an ziak lut a ni, a ti. Namchi police station-ah pawh tualthah thubuai ziahluh a nih thu a sawi bawk.

Hetih rual hian GJM core committee chuan Binay Tamang chu state hran phuta West Bangal sorkar laka lungawi lohna lantir tawpsan tur zawnga hma a lak avangin, party aṭangin hnawhchhuah a ni. Binay Tamang hi GJM-a Joint Secretary ni lai a ni a, a rual hian senior party leader Anit Thapa-a chungah pawh hremna lek a ni. GJM General Secretary Roshan Giri chuan, "GJM central committee chuan Binay Tamang leh Anit Thapa-te hi party aṭangin a hnawt chhuak a, Gorkhaland movement-ah an inrawlh a remti ve tawh lo a ni" a ti. Tamang hian kar kalta Ningani khan Darjeeling leh a chheh velah bandh chu darkar 12 chhung atan tihtawp lailawk a nih thu a sawi a, he a thusawi avang hian party chief coordinator aṭanga ban a ni tawh bawk. GJM chief Bimal Gurung chuan Tamang-a thusawi hi an hriapui loh thu sawiin, a thusawi chu thu belhchian dawl lo a nih thu a sawi.

GJM hian September 12 hian all-party meeting an buatsaih leh dawn a, West Bengal Chief Minister Mamata Banerjee chuan GJM-te inbiakna neihpui leh turin hma a la mek bawk.